Poslovne vijesti - Makedonija

Холандска компанија ќе отвора конфекциска фирма во Велес

Холандската компанија "Дена" најави дека е заинтересирана во Велес да отвори погон за конфекциски производи и да вработи 150 лица.

Претставници на фирмата предводени со генералниот директор Ралф Ван Еден го посетија Велес и остварија средба со градоначалникот Горан Петров. Тема на оваа средба беше можна идна инвестиција во областа на текстилната индустрија.

- Во Велес компанијата "Дена" веќе има погон за текстил со триесет вработени. Сакаме да се прошириме и да изградиме фабрика во кој работа ќе најдат околу 150 работници, пред се од Велес - рече Ралф Ван Еден, генерален директор на компанијата "Дена".

На средбата градоначалникот на Велес, Горан Петров го запознал Ралф Ван Еден дека општината располага со можностите и локациите за изградба на погон во двете индустриски зони Комплекс "УЗУС" и "Речани 2". Петров ги навел потребите што ги дава Општина Велес за исполнувањето на соодветни критериуми околу формата и содржината за добивање на потребната документацијата, за добивање на локацијата за изградба на погонот.

- Го запознав Ван Еден за даноците и за сето она што треба како странски инвеститор тој да го направи. Му ја кажав и гаранцијата што ја дава Велес која е стабилна општина, европски ориентирана и подготвена да прифати обврски што ќе гарантираат сигурност за странскиот инвеститор - рече градоначалникот Петров.

Сопственикот на холандската компанија најави дека веќе ги има обезбедено потребните средства за изградбата на новиот погон и дека е подготвен веднаш штом ќе ја обезбеди потребната документација, да почне со негова изградба. Доколку се биде во ред, новата фабрика со работа може да почне кон крајот на оваа година.